പ്രഭാസിനെ നായകനാക്കി മാരുതി ഒരുക്കുന്ന ചിത്രമാണ് ദി രാജാസാബ്. ഒരു ഹൊറർ കോമഡി വിഭാഗത്തിൽ ഒരുങ്ങുന്ന സിനിമ വമ്പൻ ബജറ്റിൽ ആണ് എത്തുന്നത്. ജനുവരി ഒൻപതിന് സിനിമ പുറത്തിറങ്ങും. സിനിമയുടെ പ്രീ റിലീസ് ഇവന്റ് ഇന്നലെ നടന്നിരുന്നു. ഇപ്പോഴിതാ ചടങ്ങിൽ വെച്ച് സംവിധായകൻ മാരുതി പ്രഭാസിനെക്കുറിച്ച് പറഞ്ഞ വാക്കുകളാണ് നടന്റെ ആരാധകരെ ചൊടിപ്പിച്ചിരിക്കുന്നത്.
രാജമൗലി ആണ് ഇന്ന് നമ്മൾ കാണുന്ന പാൻ ഇന്ത്യൻ കൾച്ചറിന് പിന്നിൽ പ്രവർത്തിച്ചതെന്നും അദ്ദേഹമാണ് ഒരു മീഡിയം റേഞ്ച് നായകനായ പ്രഭാസിനെ പാൻ ഇന്ത്യൻ സ്റ്റാർ ആക്കിയത് എന്നായിരുന്നു മാരുതിയുടെ വാക്കുകൾ. 'ദക്ഷിണാഫ്രിക്കയിലെ ഒരു ഗ്രാമത്തിൽ ഞാൻ പോയിരുന്നു. ഞാൻ ഒരു സിനിമാ സംവിധായകനാണെന്ന് പറഞ്ഞപ്പോൾ അവിടുത്തെ ഒരാൾ എന്നെ അത്ഭുതത്തോടെ നോക്കി. എന്റെ നായകൻ ആരാണെന്ന് അറിയാമോ എന്ന് ഞാൻ അദ്ദേഹത്തോട് ചോദിച്ചു. ഞാൻ പ്രഭാസ് എന്ന് പറഞ്ഞപ്പോൾ അദ്ദേഹം ഓ, ബാഹുബലിയിലെ നായകൻ എന്ന് മറുപടി പറഞ്ഞു. മസായ് മാരയിലെ മറ്റൊരു ഗോത്രത്തിൽപ്പെട്ട ആളുകൾക്കുപോലും പ്രഭാസ് ഇന്ന് പരിചിതനായി മാറിയിരിക്കുന്നു. എല്ലാ സംവിധായകരും രാജമൗലിയോടാണ് കടപ്പെട്ടിരിക്കുന്നത്. ഇന്ന് എല്ലാവരും "പാൻ ഇന്ത്യ, പാൻ ഇന്ത്യ" എന്ന് പറഞ്ഞ് അഭിമാനപൂർവ്വം നടക്കുന്നുണ്ട്. പക്ഷേ അദ്ദേഹമാണ് അതിൽ തന്റെ ജീവിതം അർപ്പിച്ചതും, ഒരു മീഡിയം റേഞ്ച് നായകനെ പാൻ-ഇന്ത്യൻ ആക്കി മാറ്റിയതും', മാരുതി പറഞ്ഞത്.
എന്നാൽ ഇതിന് പിന്നാലെ വലിയ വിമർശനങ്ങളാണ് സോഷ്യൽ മീഡിയയിൽ ഉയരുന്നത്. ബാഹുബലിക്ക് മുൻപും പ്രഭാസ് ഒരു വലിയ സ്റ്റാർ ആയിരുന്നു എന്ന് പലരും കമന്റിൽ കുറിച്ചു. എന്നാൽ മരുതിയെ അനുകൂലിച്ചും ചിലർ രംഗത്തെത്തി. ബാഹുബലിക്ക് മുൻപ് സ്റ്റാർ ആയിരുന്നു പ്രഭാസ് എങ്കിലും ഇന്നത്തെ ലെവൽ സ്റ്റാർഡം അദ്ദേഹത്തിന് ഒരിക്കലും ഇല്ലായിരുന്നു എന്നും അഭിപ്രായങ്ങൾ ഉയർന്നു. ബാഹുബലി ആണ് നടനെ പാൻ ഇന്ത്യൻ താരമാക്കിയതെന്നും മാരുതി പറഞ്ഞതിൽ തെറ്റൊന്നും ഇല്ലെന്നും അവർ കൂട്ടിച്ചേർത്തു.
ഏവരേയും അതിശയിപ്പിക്കുന്ന അമാനുഷിക ഘടകങ്ങളും ചില മിത്തുകളും ഒക്കെ സന്നിവേശിപ്പിച്ചുകൊണ്ട് എത്തുന്ന ഹൊറർ എന്റർടെയ്നറായ 'രാജാസാബ്' 'ഹൊറർ ഈസ് ദ ന്യൂ ഹ്യൂമർ' എന്ന ടാഗ് ലൈനുമായാണ് എത്തുന്നത് എന്നതിനാൽ തന്നെ പ്രേക്ഷകരേവരും ഏറെ ആകാംക്ഷയിലാണ്. ഫാമിലി എൻ്റർടെയ്നറായെത്തിയ ‘പ്രതി റോജു പാണ്ഡഗെ’, റൊമാൻ്റിക് കോമഡി ചിത്രമായ ‘മഹാനുഭാവുഡു’ എന്നീ സിനിമകൾക്ക് ശേഷം മാരുതി തിരക്കഥയെഴുതി സംവിധാനം ചെയ്യുന്ന ചിത്രമാണ് ‘ദ രാജാ സാബ്’.
തെലുങ്ക്, തമിഴ്, മലയാളം, കന്നഡ, ഹിന്ദി എന്നീ അഞ്ച് ഭാഷകളിലായി പാൻ ഇന്ത്യൻ ചിത്രമായി പ്രദർശനത്തിനെത്തുന്ന രാജാസാബ് പീപ്പിൾ മീഡിയ ഫാക്ടറിയുടെ ബാനറിൽ ടി.ജി. വിശ്വപ്രസാദാണ് ചിത്രം നിർമ്മിക്കുന്നത്. വിവേക് കുച്ചിബോട്ലയാണ് സഹനിർമ്മാതാവ്. തമൻ എസ്. സംഗീതം പകരുന്ന ചിത്രത്തിന്റെ ഛായാഗ്രഹണം: കാർത്തിക് പളനി, ചിത്രസംയോജനം: കോത്തഗിരി വെങ്കിടേശ്വര റാവു, ഫൈറ്റ് കോറിയോഗ്രഫി: രാം ലക്ഷ്മൺ മാസ്റ്റേഴ്സ്, കിംഗ് സോളമൻ, വിഎഫ്എക്സ്: ബാഹുബലി ഫെയിം ആർ.സി. കമൽ കണ്ണൻ, പ്രൊഡക്ഷൻ ഡിസൈനർ: രാജീവൻ, ക്രിയേറ്റീവ് പ്രൊഡ്യൂസർ: എസ് എൻ കെ, പി.ആർ.ഒ.: ആതിര ദിൽജിത്ത്.
Content Highlights: Director maruthi's words about prabhas goes viral